1 ден: 22.09.2026 (вторник) Скопје-Виена-Минхен-Маракеш
Состанок на аеродромот во Скопје во 10.00 ч. Полетување кон Виена во 12.35 ч, слетување во 14:10 ч. Летот за Минхен е во 19.55 ч, слетување во 20.55 ч. Летот за Маракеш е во 22.15 ч, пристигнување во 01.10 ч. Организиран трансфер со автобус од аеродромот до хотел “ Grand Plaza Marrakech ” 4*, лоциран во центарот на градот. Ноќевање.
2 ден: 23.09.2026 (среда) Маракеш
Појадок. Сместен во подножјето на снежните планини Атлас и граничејќи се со прочуената Сахара, живиот град Маракеш, е волшебна туристичка дестинација. Маракеш е дом на најголемиот берберски пазар во Мароко и еден од најпрометните плоштади во светот, Djemaa el Fna. По доручекот, одиме на разглед на најзначајните места во Маракеш. Започнуваме со џамијата Koutoubia, ремек-дело на архитектурата на берберското племе Алмохад, и најпознатото обележје на градот. Продолжуваме кон палатата Bahia, архитектонско чудо од 19-тиот век со безброј мозаици и бујни градини, кое во најубаво светло ги покажува занаетчиските достигнувања на Мароко. Следуваат Саадските гробници, почивалиште на династијата Саад, изградени со украсен мермер и нежни резби, кои биле сокриени со векови сѐ до нивното октирвање во 1917 година. За крај уживаме во спокојот на градините Majorelle, кои претставуваат оаза од егзотични растенија, живи кобалтно-сини структури и спокојни базени. Градините ги подигнал францускиот архитект Paul Sinoir, а подоцна со многу љубов ги реставрирал познатиот дизајнер Yves Saint Laurent. Се враќаме во хотелот, а до крајот на денот имаме слободно време за истражување на тесните улички испреплетени како лавиринт, исполнети со занаетчии кои коваат месинг, бојат ткаенини и ткаат теписи. Ноќевање.
3 ден: 24.09.2026 (четврток) Маракеш-пустина Агафај
Појадок. Слободно време за слободни активности во Маракеш и за користење на СПА центарот во хотелот. Попладнето е резервирано за незаборавна екскурзија до пустината Агафај, прекрасен карпест пејзаж сместен во непосредна близина на Маракеш. За разлика од песочните дини на Сахара, Агафај нуди драматична панорама на ридови од камен поставени наспроти величествените планини Атлас. По пристигнувањето, ќе имаме несекојдневна прилика да јаваме камили и од таа перспектива да го доживееме спокојството на пустината, јавајќи на камили по суровиот терен. Подоцна ќе застанеме да уживаме во освежувачки чај од нане во традиционален берберски шатор, каде што тишината на пустината и топлото гостопримство на нашите домаќини создаваат вистински автентичен марокански момент. Додека попладневната светлина омекнува над златните ридови, се враќаме во Маракеш со срца збогатени со тивката магија на Агафај. Слободно време за вечера и ноќевање.
4 ден: 25.09.2026 (петок) Маракеш-Рабат
По појадокот се одјавуваме од хотелот и се упатуваме кон Рабат, шармантниот главен град на Мароко, лоциран на устието на реката Бурегрег. Рабат, со својата фасцинантна исламска и француска колонијална архитектура изобилува со прекрасни карпести и песочни плажи, еколошки разновидна природа, и жив центар со бујни, зелени паркови. По пристигнувањето ја посетуваме Chellah, древна некропола каде се испреплетуваат римски и исламски урнатини. Продожуваме кон Oudayas Kasbah, утврдена тврдина со поглед на Атлантскиот Океан, позната по своите сино-бели улички, дворови исполнети со цвеќиња и спокојни андалузиски градини кои нудат мирно бегство од градскиот ритам. На крај ја посетуваме кулата Hassan, минаре од 12-ти век, кое гордо стои покрај Мавзолејот на Мохамед V, последно почивалиште на модерните кралеви на Мароко – симбол на единственост, почит и континуитет. Се сместуваме во хотелот Onomo Hotel Rabat Terminus 4*. Ноќевање.
5 ден: 26.09.2026 (сабота) Рабат-Фес
Појадок, заминување кон Фес, вториот град по големина во Мароко и поранешна престолнина. Фес е егзотична мешавина од арапска архитектура, антички улички и шарени пазари, сето тоа измешано со доза на модерна култура. Дом на џамијата Karaouine, која датира од 859 година, Фес се смета за духовно седиште на Мароко. Пристигнуваме во Фес и се сместуваме во хотелот Barcelo Fes Medina , 4*, во близина на центарот на градот. Слободно време за прошетка низ новиот дел на Фес. Ноќевање.
6 ден: 27.09.2026 (недела) Фес
Појадок. Следува разглед на Фес, кој често се опишува како музеј на отворено. Започнуваме со медресата Al-Attarine, извонреден пример на архитектура на Маринидите, берберска исламска династија. Потоа се упатуваме кон медресата Bou Inania, теолошки колеџ познат по сложената дрвенарија и елегантниот дизајн.Продолжуваме кон универзитетот Al-Qarawiyyin, основан во 9 век и признат од УНЕСКО како најстариот универзитет во светот кој постојано работи, а оттаму ги посетуваме познатите штавници, каде работниците бојат кожа со бокали боја според вековната традиција што сѐ уште се практикува. Ја завршуваме турата со плоштадот Сефарин, каде металурзите ги коваат бакарот и месингот во деликатни форми, исполнувајќи го воздухот со ритмички звуци. Слободно време за прошетка низ медината, каде што ќе се опиете од мирисите на зачини и ќе се изгубите низ лавиринтските улички и повиците на продавачите. Вечерта организирана вечера во локален ресторан со музика. Ноќевање.
7 ден: 28.09.2026 (понеделник) Фес-Казабланка
Појадок, одјавување од хотелот и заминување за Казабланка, градот на Атлантскиот Океан, индустриско, економско и културно срце на Мароко и нејзин најкосмополитски, либерален и прогресивен град. Оваа метропола има многу да им понуди на пребирливите патници со своите скриени историски и културни бисери. Градот е познат по својата спектакуларна архитектура во стилот на движењето Арт Деко и на Мурите, а е овековечен во култниот филм “Казабланка” од 1942 година. Сместување во хотелот Barceló Casablanca , 4*, лоциран во срцето на градот. До крајот на денот слободно време за одмор од патувањето и за слободни прошетки во најголемиот град на Мароко. Ноќевање.
8 ден: 29.09.2026 (вторник) Казабланка-Маракеш
Појадок, а потоа одиме во посета на најзначајните знаменитости на градот. Најпрво ја посетуваме џамијата Hasan II, која е ремек-дело на модерната исламска архитектура и една од најголемите џамии во светот, драматично сместена на Атлантскиот брег. Нејзините прекрасни мозаици, мермерни подови и комплексна дрвенарија ја покажуваат мароканската изработка во најдобро издание. Прошетката ја продолжуваме со посета на квартот Habous, шармантен дел од градот што го спојува традиционалниот марокански стил со француското колонијално планирање, кој изобилува со книжарници и продавници за зачини. За крај одиме на прошетка низ плоштадот Mohammed V, каде што ќе можеме да се восхитуваме на Арт Деко архитектурата, како и по крајбрежјето и неговите кафулиња и ресторани. Слободно време за индивидуални активности во Казабланка, а вечерта организиран трансфер до аеродромот во Маракеш.
9 ден: 30.09.2026 (среда) Маракеш-Минхен-Виена-Скопје
Полетување кон Минхен во 02;00 ч, слетување во 06;40 ч. Поаѓање за Виена во 08;00 ч, слетување во 09;05 ч. Летот за Скопје е во 10;20 ч., слетување во 11;50 ч.
